काभ्रेपपलाञ्चोक । प्रधानमन्त्री पुष्पकमल दाहाल प्रचण्डले आसन्न भारत भ्रमणमा विद्युत बिक्री र उत्पादनका विषयहरूमा केही नयाँ सहमति सम्झौता हुने स्थिति रहेको बताएका छन् ।
काभ्रे जिल्लाको महाभारत गाउँपालिकामा सडक तथा ग्रामीण विद्युतीकरण कार्यक्रमको आज शिलान्यास गर्दै प्रधानमन्त्री प्रचण्डले यसबारे जानकारी दिएका हुन् ।
सबै जनताको साथ र सहयोगसहितको प्रतिबद्धता भए अबको ५ वर्षमा रेकर्ड बनाउने उनले बताए । प्रधानमन्त्रीले लोडसेडिङको युगबाट विद्युत् बिक्री गर्ने युगमा आएको बताउँदै भारत भ्रमणका क्रममा विद्युत बिक्री र उत्पादनबारे सम्झौता हुने उल्लेख गरे । उनले भ्रष्टाचार नियन्त्रणका लागि एउटा नयाँ लडाइँ सुरु भएको बताउँदै त्यसका निम्ति जनयुद्धको जस्तै साथ चाहिएको बताएका छन् ।
प्रधानमन्त्री प्रचण्डले विकास र समृद्धि बिना अन्यायको अन्त्य र समाजवादको नयाँ युग सूत्रपात गर्न नसकिने उल्लेख गर्दै भने, ‘त्यसमा पनि तपाईँहरूको हिजोको जस्तो साथ सहयोग आवश्यक छ । म तपाईँहरूसँग अपील गर्न चाहन्छु ।’
आफूले सरकारको नेतृत्व सम्हालेदेखि नै तीन वटा शब्दलाई बढी महत्त्व दिएको बताउँदै भने, ‘अन्यायमा परेकालाई न्याय चाहियो । समानता चाहियो । तिनीहरूलाई पनि अधिकार चाहियो । सामाजिक न्याय भनेको त्यही हो । सुशासन भनेको हाम्रो देशमा विसङ्गति, विकृति र भ्रष्टाचारले विकराल रूप लिएको छ । जबसम्म भ्रष्टाचारलाई अन्त्य गरिँदैन नेपाली जनताले सुख र समृद्धिको दिन देख्न पाउने छैनन् ।’
‘जुन जुन प्रदेश हिजोको राज्यबाट पछाडि पारिएको थियो, म तिनै प्रदेशमा विकास निर्माण गति दिन बढी जोड गरेको छु । म प्रधानमन्त्री भएपछि सुदूरपश्चिम प्रदेश र कर्णाली प्रदेशलाई हिजो सामन्ती राज्यले बढी विभेदमा पार्यो तिनै प्रदेशमा मैले बढी ध्यान दिएको छु ।’ उनले भने, ‘काठमाडौँ वरिपरि नै भए पनि हिजोको राज्यसत्ताले पछाडि पारेका क्षेत्रहरू अर्थात् पालिकाहरूलाई विकासमा अगाडि ल्याउने हाम्रो प्रतिबद्धता छ । त्यही प्रतिबद्धता अन्तर्गत नै अबका ५ वर्षमा यो क्षेत्रमा भएको विकास निर्माणले पर्यटकहरू ओइरिने छन् ।’
हिजोको राज्यले काठमाडौँको नजिकै भएर पनि यहाँका नागरिकलाई विकासबाट बञ्चित गराएको बताउँदै प्रधानमन्त्री प्रचण्डले सोही असुविधा र विभेद, अपमान र अन्यायविरुद्ध जनता आन्दोलन र क्रान्तिमा लागेको धारणा राखे ।
‘यी क्षेत्र क्रान्तिका आधार इलाका बने । महाभारत र खानीखोला जस्ता विकट गाउँहरू क्रान्ति र परिवर्तनको निम्ति ठूलो भूमिका खेलेको क्षेत्र भएको नाताले गणतन्त्रको घोषणा पछि सबैभन्दा छिटो विकास र सुविधा पाउने अधिकार यही क्षेत्रको हो । यो क्षेत्रमा तपाईँहरूले पनि आफ्ना विकास प्रेमी जनप्रतिनिधिलाई जिताउनुभयो र मैले पनि यहाँको विकास र निर्माणलाई उच्च प्राथमिकता दिएँ । त्यसैको परिणाम म धेरै पटक आएँ ।’ उनले भने ।
