विराटनगर । नेकपा माओवादी केन्द्र प्रदेश १ संसदीय दलका नेता इन्द्रबहादुर आङ्वोले प्रदेश १ मा सत्ता समीकरणको फेरबदल केही नहुने बताएका छन् । माथि जे जस्तो परिस्थिति निर्माण भएपनि, जेजे भए पनि प्रदेश १ सरकारकाे सत्ता समिकरणमा फेरबदल नहुने बताएका हुन् ।
नेकपा एमालेले संघीय सरकारलाई दिएको समर्थन फिर्ता लिएर मन्त्रीलाई फिर्ता बोलाएपनि माओवादीले प्रदेश १ सरकारलाई दिएको समर्थन फिर्ता नलिने बताउँदै उनले समर्थन फिर्ताको विषयमा पार्टीले अहिले नै केही नसोचेको बताए । आङ्वोले हिक्मत कार्कीको नेतृत्वको सरकारलाई माओवादीले दिएको समर्थन रहिरहने बताउँदै अहिले भइ रहेको सरकारले नै निरन्तरता पाउने बताए । उनले भने –‘अहिले प्रदेश १ को सत्ता समीकरण परिवर्तन हुँदैन । माओवादीले प्रदेश १ को सरकार परिवर्तनका बारेमा थप सोचेको छैन ।’
प्रदेश १ मा माओवादी, जनता समाजवादी र राप्रपाको समर्थनमा एमाले नेतृत्वको सरकार रहेको छ । ९३ सीट रहेको प्रदेशसभामा एमालेको ४०, माओवादीको १३, राप्रपाको ६ र जसपाको १ सिटसहितको समर्थनमा एमाले नेतृत्वको सरकार बनेको छ ।
सरकारमा माओवादीका २, राप्रपाका १ र जसपाका १ जना मन्त्री रहेका छन् ।
