काठमाडौं | टाइगर कप आमन्त्रित खुल्ला क्लब च्याम्पियनसिप भलिबल प्रतियोगिताको सम्पूर्ण तयारी पुरा भएको छ । पोखरा रंगशालामा यहि पुष २६ गतेबाट सञ्चालन हुने प्रतियोगितामा महिला र पुरुष गरी १० टिमको सहभागिता रहने टाइगर ग्रुपका अध्यक्ष नारायणप्रसाद शर्माले जानकारी दिए ।

पहिलो राउण्ड रोविन लिग अन्तर्गतका दैनिक रुपमा महिला र पुरुष तर्फका ४ खेल हुने आयोजकले जनाएको छ । प्रतियोगिताका लागि प्रवेश शुल्कवापत २ सय र ३ सय निर्धारण गरिएको आयोजकले जनाएको छ । प्रतियोगितालाई सफल बनाउन शिव श्रेष्ठ संयोजक, सहसंयोजक गोविन्द थापा सहितको विभिन्न उपसमितिहरू गठन गरी सम्पूर्ण कामहरू पुरा गरिएको सचिव प्रकाश बरालले बताए ।

प्रतियोगिता सफल बनाउन मुख्यमन्त्रीको कार्यालय, राष्ट्रिय खेलकुद परिषद, नेपाल भलिबल संघ, यूवा तथा खेलकुद मन्त्रालय गण्डकी, नेपाल भलिबल संघ जापान शाखा, प्रदेश खेलकुद परिषद गण्डकी, जिल्ला खेलकुद विकास समिति पोखरा महानगर पालिका लगायतका संघ–संस्थाको सहयोग रहेको छ ।